" घरहींन मथुरा काशी है "
अवधी कविता ---
लेखक - आनन्द गिरि मायालु
नेपालगंज, लुंबिनी (नेपाल)
" घरहींन मथुरा काशी है "
महतारी बाप कै सेवा करो तौ घर मा मथुरा काशी है।
जन्म देय वाले कै सेवक बने जो सबसे बडा सन्यासी है।।
दर दर भटकि तुम्का पावे खातिर ऊ तुम्हार महतारी है।
रूप कद चाहे जस है ऊ दुनियम सबसे प्यारी है।।
तुमरे सुख कै खत्तीर अपने नींदन कै बलिदान दिहिंन हैं।
भूंखे पेट रहि कै तुम्हरे खातिर दोसरेक काम किहिन हैं।।
नौ महिना तुमका पेटेम राखिन आधा पेट खाइन हैं।
बड़े दुख सही कै महतारी तब तुम्का जन्माइन हैं।।
नजर न लागय दुनियां कै करिया टिक्का तुमका लगावत रहीं।
दिन मा कइयों बाजी तुमका दूध भात खवावत रहीं।।
प्यार दुलार तुमका दई पढ़ाए लिखाय बड़ा किहिन हैं।
ज्ञान सिखाए तुमका अपने पांवन पर खड़ा किहिंन हैं।।
तुम्हिंन तौ अपने महतारी बाप कै आंखी कै तारा हौ।
तुम्हिंन तौ अपने महतारी बाप कै बुढ़ापा कै सहारा हौ।।
जिंदगी भर तुम खुश अउर सुखी रहो करत हैं कामना।
तुमरे खातिर बड़े बड़े मुसीबत से खुदे करत हैं सामना।।
जियत हैं तुम्हरे खातिर कबहूं उनके न अपमान करो।
जिंदगिम एक बाजी मिलें महतारी बाप कै सम्मान करो।।
आवा बुढ़ापा पन थकिगे अब तुम्हिंन बस एक सहारा हौ।
महतारी बाप कै खातिर तुम्हिन सबसे प्यारा हौ।।
जब तक जिंदगी रहे महतारी बाप कै आदर सत्कार करो।
बडिहा बडिहा खवाव पहिराव अउर प्यार करो।।
जिंदे मा दुख मरेप भोज खान पान सब कुछ बेकार है।
महतारी बाप कै सेवा न करे जियब उकई धिक्कार है।।
महतारी बाप कारन तुमका ई सुग्घर संसार मिला है।
घर पढ़ाई मेहरूवा लरिके सबकै तुमका प्यार मिला है।।
महतारी बाप कै सेवा कईकै दूध कै कर्ज चुकाओ तुम।
महतारी बाप कै मन खुश होय कारन बन जाओ तुम।।
महतारी बाप भगवान है उनका पूजेम तुम्हार स्याबाशी है।
खुश राखव महतारी बाप तौ घरहीन मथुरा काशी है।।